Heto na si Gumamela --- bulaklak na ang kahulugan ay... "Delicate Beauty" o sa wikang Filipino, "Maselang Kagandahan".
Matapos ang mahaba-habang pagninilay-nilay, naisip kong ito na lamang ang gamitin kong pangalan. Naisama ko rin sa aking mga pinagpilian ang Sampaguita, na ang ibig sabihin naman ay "Amiability" o pagiging masiyahin. Kaya lamang, wala akong kuha ng sampaguita sa aking koleksyon ng mga larawan. Gusto ko sana'y sarili kong kuha (o kahit ng aking mga kaibigan katulad ng gamit ko ngayon) ang aking gagamitin. Arte.hehe.
Maselang kagandahan...
Hindi dahil sa pinapalagay kong ako'y maganda. Hehehehe.
Para sa akin, ang ibig sabihin nito ay...
---May katangi-tanging buhay at yumi na mahirap ipagpalit sa iba.
---Kapag pinabayaan, madali itong mawawala.
---Kailangan ng maiging pag-aalaga, sapat na panahon at "effort" upang panatilihin ito.
---Kung gugustuhin, maaari pa itong lalong pagandahin. Para lalong umangat ang kanyang kagandahan sa iba.
Hindi ba't ganito rin ang ating bansa? Ang Pilipinas ay isang bansang napakaganda -- mula sa pinakamalalalim na karagatan hanggang sa pinakamataas na mga bundok. May katangi-tangi itong gandang hindi maaaring maihambing sa iba. Ngunit marami nang nagpapabaya. At nakakatakot na dumating sa puntong ang Pilipinas ay parang isang tuyot na bulaklak na lamang.
Ang gumamela ay maaaring magbigay ng paalala sa atin kung ano ang ating layunin, bilang mga magkakapatid sa samahang ito --- na pangalagaan ang MASELANG KAGANDAHAN ng ating bansa... sa lahat ng aspeto --- pisikal, moral, at pagiging isang tahanan ng mga Pilipino. Kaakibat nito ang ating ginagawa ngayong pagmumulat sa iba nating mga kababayan upang maisip rin nilang pangalagaan ang Pilipinas.
Naaadik na ata ako sa pagpo-post.hahaha.
Sisikapin kong gampanan nang maayos ang lahat ng aking mga tungkulin bilang miyembro.
Sa ngayo'y bumubuhos ang napakaraming gawain--sa trabaho, dito, at sa iba ko pang mga pinagkakaabalahan. Buti nalang ako'y reyna ng kangaragan.
Mabuhay tayong lahat!
